نصائح هامة للمتسوقين في هذه الفترة بالتزامن مع انتشار جائحة كورونا
محاولة متواضعة للإجابة عن سؤال متكرر.
المنشور ده مهم خاصةً للناس اللي عايش معهم كبار السن، اللي هم حقيقةً بركة حياتنا ❤️.
١- أولا هنكتب قائمة باحتياجات البيت الأساسية عشان نوفر وقت التسوق في السوبرماركت.
٢- ماتاخدش معك حد إلا إذا كان ضروري تاخده، خصوصا الأطفال، لأنهم بيمشوا يلمسوا كل حاجة في المحلات. وبلاش نغمة (أصل يا عيني ماخرجوش من زمان.)
٣- لو عندك جلاڤز (جوانتي) يفضل انك تلبسه، لكن مش ضروري، والأهم چل التعقيم يكون في جيبك.
(الڤيرس لا يخترق الجلد)
٤- لو بتلبس نضارة نظر، البسها قبل ما تطلع من البيت. العين أحد مداخل الڤيرس فمفيش داع كل شوية نلبس النضارة ونقلعها لأن ايدك ممكن تلمس عينك.
٥- اكتر حاجة ملوثة على الإطلاق في السوق هي ايد عربة التسوق. نظف ايد العربة بمنديل مبلل wipes، لو معك أو باستخدام چل التعقيم.
٦- حافظ على مسافة كافية بينك وبين كل شخص في السوق. افترض ان كل واحد حامل للڤيرس.
٧- ما تلمسش الأشياء في السوبرماركت بدون ضرورة حتى لو كنت لابس جلاڤز.
٨- حاول تحاسب بكارت البنك او الفيزا بدل الفلوس، إذا أمكن.
٩- لو لابس جلاڤز، اقلعه وتخلص منه بطريقة سليمة قبل ما ترجع العربية - تخيل ان عليهم دهان وخايف ايدك تلمسه.
١٠- عقم ايدك بالچل بعد ما تحط الحاجة في العربية.
١١- لما توصل البيت، مفيش داع حد يساعدك في شيل الحاجات.. لو حد ساعدك للضرورة لازم يعمل نفس الخطوات اللي انت بتعلمها.
١٢- اخلع حذاءك قبل دخول المنزل.
١٣- حط الحاجات اللي اشتريتها عند مدخل الشقة مباشرة.
١٤- اغسل إيديك كويس بالماء والصابون (٢٠ ثانية) وغير ملابسك وحطها في الغسالة
١٥- ارجع للأكياس اللي اشتريتها وفضيها من المشتروات. اقسم الحاجات قسمين: قسم الخضار والفاكهة، وقسم العبوات والعلب الخ.
١٦- الأكياس الفاضية ممكن تجمعهم في كيس واحد نضيف. ممكن ترميهم أو تحتفظ بيهم لو حابب تستخدمهم. الڤيرس بيموت لوحده خلال ٤-٥ أيام على البلاستيك.
١٧- اغسل ايديك مرة تانية - افترض أنها تلوثت بفيروس أثناء التفريغ.
١٨- استخدم محلول كلور مناسب وقماشة لتنظيف العبوات المعدنية والبلاستيكية والعلب والأغطية. ويا ريت لو محلول الكلور والقماشة ومكان التنظيف يكونوا جاهزين من قبل ما تنزل.
١٩- اغسل الخضار والفاكهة في حوض المطبخ بالماء وقليل من الخل. وبعدين بالماء لوحده. (الخل لا يقتل الڤيرس لكن بيساعد على إزالة الشوائب التي قد تحتوي عليه) وبعض الناس بيفضلوا استخدام القليل من الصابون بدل الخل، لا مانع برضه.
نصيحة جانبية: أكتر ناس هيتضرروا من فترة الحظر دي هم صغار التجار والباعة، فيا ريت يا جماعة نحاول ننفعهم بالشراء منهم بقدر الإمكان خلال هذه الفترة.
#منقول من الفيسبوك للفائدة
